Feira do Cocido de Lalín

Unha referencia imprescindible no calendario gastronómico galego e unha cita ineludible como prólogo do Entroido, xa que a Feira do Cocido de Lalín celébrase sempre o domingo anterior ao domingo de Entroido

O mindoniense de agudo saborear e primeiro pregoeiro do Cocido, Álvaro Cunqueiro, falaba de que o atento e intelixente comensal podería distinguir e paladear ata 27 sabores diferentes na cachuca ou cacheira de porco, só emparellada con grelo e chourizos no protagonismo sen par dun bo Cocido de Lalín. Unha riqueza de matices e experiencias que se reproducen con cada un dos veciños e visitantes que ao longo de case seis meses degustan en Lalín o prato rei da gastronomía de Galicia, o Cocido.

Unha vintena longa de matices enchen o padal como outras tantas actividades adornan unha Feira do Cocido que estala en sensacións culturais, deportivas, sociais e gastronómicas que ao longo de tres meses converten a Lalín en centro de atención e punto de encontro para todos os galegos e moitos outros visitantes que se achegan a Galicia dende máis aló do Padornelo ou dende o sur atravesando o Miño.

Se Cunqueiro voltase a Lalín dende o ceo dos grandes da literatura galaica e de entre os deuses da gastronomía e o bo comer, sen dúbida voltaría a poñerse mans a obra para deseñar, aplicado á Feira do Cocido, un de aqueles itinerarios turístico-gastronómicos dos que foi pioneiro aló polos anos 60 e que tan de moda están hoxe en día. Dende a Matanza Tradicional que este ano se celebrará no Corpiño, ao pé do santuario do mesmo nome, ata o pregón que el mesmo deu e que a xornalista Susanna Griso secundará 45 anos despois, pasando pola Encomenda do Cocido, a Gala de Gastronomía, o Feito en Lalín ou as diversas xornadas que sobre o Cocido de Lalín se celebran en diversas partes como en Madrid, podería deseñar un itinerario cheo de actividades capaces de atraer a tan variopintos visitantes como deportistas -Carreira solidaria, Rali do Cocido, etc- afeccionados as artes ou a cultura ou amantes da exquisita e desbordante gastronomía de interior.

Como garante do espírito da slowfood que antes de atender a un anglicismo xa defendía o mestre Cunqueiro, o Cocido de Lalín segue a ser unha xanela de aire fresco que arrecende a tradición e na que teñen cabida as propostas de deconstrución de mozos e moi preparados cociñeiros lalinenses que aproveitando o legado de nais e avóas reconverten o noso apolíneo prato nunha versión máis contida de tamaño pero igual de sabedeira, grazas aos espléndidos produtos de primeira calidade que achegan o agro e a horta da zona que igual preparan un rotundo cocido que se amalgaman nunha proposta desestacionalizada e máis propia de cando os calores apretan.

As portas da edición do 2013, o colectivo de Asociacións de Prensa e Televisión de España distinguiron a nosa Feira ca Antena de Ouro que secunda o recoñecemento que xa en 2010 se otorgou ao evento como Festa de Interese Turístico Nacional.

Cunha aposta de calidade como compromiso cara ao noso visitante, botou a andar a XLV Feira do Cocido á que estades todos convidados e na que a oferta é tan ampla como os gustos de cada un dos que se achega ao KM0 de Galicia, Lalín.

José Crespo
Alcalde de Lalín

receita do cocido de lalin

INGREDIENTES PARA 10 PERSOAS

1/2 cacheira de porco curada. 1/2 Lacón curado (aprox. 1 Kg). Soá (aprox. 1,5 Kg).
2 Rabos salgados (aprox. 250 gr) Touciño veteado (aprox.750 gr) Costela salgada (aprox. 750 gr)
3 Fouciños salgados.
5 Orellas salgadas.
5 Unllas salgadas.

10 Chourizos de Lalín.
5 Chourizos ceboleiros.
4 Linguas salgadas.
1 Galiña de casa (aprox. 1 Kg). Tenreira (aprox. 750 gr).
2 anacos de unto (700 gr). Grelos (6 molladas de 1 Kg). Patacas (aprox. 1,5 Kg).

Menu Comida

Sopa
Cocido Lalín

postre

Filloas
Leite Frita
Queixo con marmelo Rosquillas

bebida

Viño D.O. Monterrei Café
Augardente Queimada

MODO DE PREPARACioN

CATRO DÍAS ANTES: pór o lacón a desalgar en auga fría e, a poder ser, nunha zona fresca para evitar que colla cheiros. E preciso cambiar a auga cada 24 horas.

DOUS DÍAS ANTES: lavar coidadosamente toda a carne de porco e poñela a desalgar e hidratar tamén en auga fría, cambiando a auga ás 24 horas.

UN DÍA ANTES: pór a remollo os garabanzos e as fabas en cadanseu recipiente.

DÍA DA COCCIÓN: Pór ao lume, preferiblemente nunha cociña de leña, unha pota de auga fría e un anaco de unto. Botar o lacón a cocer entre 2 horas e 2 Horas e media e ir espumando durante ese tempo para retirar as impurezas. Ao mesmo tempo , incorporar a cacheira e o resto da cerne de porco e ir comprobando a súa cocción.

Pór outra pota ao lume, tamén con auga fría e outro anaco de unto, e botar a carne de tenreira e de galiña a cocer durante aproximadamente unha hora. Aproveitar ese tempo de cocción para botarlle sal.

Pór unha terceira pota ao lume con auga a rebordar (é recomendable aproveitar a auga da cocción das carnes despois de colala) e botar nela os garabanzos e as fabas, deixándoos cocer durante unha hora. Engadir nese tempo os chourizos e sacarlle a graxa aos poucos.

Nunha cuarta pota, botar os grelos e as patacas a cocer na auga das carnes (despois de coala), deixandoas cocer ata quedar tenras.

SERVIZO

1. Caldo ou sopa do cocido (opcional).
2. Cocido: nunha fonte sérvense as patacas enteiras e os grelos; noutra bandexa, os chourizos e os garabanzos; noutra, a carne de porco; e noutra, a carne de tenreira e a de galiña.
3. Postres: Filloas (con mel e zucre), orellas, leite frita e queixo con marmelo.

BEBIDA

Viño tinto galego, café e queimada.
Os principais segredos do cocido de Lalín, con independenza de todas as variantes que cada cociñeiro/a lle imprime dacordo coa súa sabedoría e experincias acumuladas ao longo dos anos, radican na calidade dos productos, no seu tempo de cocción, na súa abundancia, na utilización de augas blandas e, sobre todo, nunha boa compañía para comelo. 

      http://www.lkm0.org/receita-do-cocido

https://feiradococido.lalin.gal